HABITŪ caffè (The ONE) (已結業)

今日難得一天平日假期，一個人獨自係街漫遊。咖啡癮起，想到The One入面間Habitu，果度景色開揚，絕對係嘆咖啡同忙裡偷閒嘅好選擇。見到有冬日限定版嘅白松露栗子鮮奶咖啡。立即急不及待咁叫黎試下。利申:本人係松露，栗子，咖啡嘅愛好者。有咖啡，當然唔少得甜品。今次叫咗開心果榛子蛋糕，賣相吸引。先講白松露栗子鮮奶咖啡，賣相同相入面嘅無咩分別，一入口嘅泡沫，已經充斥住白松露嘅氣，嗰種香並唔係淡淡咁簡單，而係每一啖咖啡都散發出松露香，真係好正。至於栗子味亦好香濃，但又唔會蓋住咖啡嘅香味。三種味道都好配合，咖啡迷不能錯過。至於開心果榛子蛋糕，個人認為開心果味同榛子味突出，但太甜，而且亦有少少搶咗大家嘅獨特性。 屬於可以一試。咪住咪住，原來咖啡底藏有兩粒栗子蓉，怪不得店員提醒要將底部搞渾。不過還是覺得，唔搞渾，分開飲，好味一點。