十二味麻辣小當家 (已結業)

同幾個朋友係奧海城行行下街突然好想食辣，於是去左奧海城3期既12味麻辣小當家。當日去到中午時間，餐廳都有提供到午餐menu，價格大約$48-$68不等。餐廳入面座位唔算多，當日都坐滿晒人，侍應就叫我地坐露天座位。宜家天氣涼涼地都可以接受，但當夏天時就會好熱好辛苦。而食物方面，我同朋友就叫左酸菜魚同牛肉麻辣香鍋。上菜速度唔算快，可能即叫即整關係。侍應首先比左個酸酸地既木耳比我地做前菜，大約等左10幾分鐘就上左菜。食物都好熱辣辣，份量好足。朋友點的牛肉麻辣香鍋十分惹味，入面有蓮藕，海帶，薯條，牛肉，非常足料。而我點既酸菜魚都好夠酸辣味，魚質好結實，好好食。