豐鍋雞煲 (荔枝角道) (已結業)

天氣凍左，自然想食返啲熱野調劑下，咁就計劃去食雞煲or打邊爐，今次去開深水埗做野，就揀左呢間餐廳。我原本睇定左呢間食佢嘅海龍皇套餐，係打邊爐黎嘅，主要有海鮮，肥牛豚肉，丸子餃類，蔬菜麵類等，好豐富。可惜黎到時朋友話近排可能食得太多，滯滯地，今次唔想叫咁多野食，怕浪費。。。咁轉食個雞煲啦，食完再睇下點。我地叫左半隻雞咋，都好大盤。個雞煲煮無耐就好香好惹味，侍應姐姐都好服待周到，響我地面煮埋。我地同時發覺，差不多食完時，雞煲先係最入味。。食得太快添！跟住見仲有quota，就叫左份牛柳粒，水魷同自家制響鈴。選擇牛柳粒係因為牛味較重，不過煮嘅時間就要耐啲。水魷就係因為我鍾意食，易咬斷岩哂我箍妹口味。估唔到嘅係，兩樣野份量都好大碟，若果可以選擇半份就更好。另外一個係佢地自創嘅即炸芝士紫菜響鈴，幾特別，應該係夾左成塊四方芝士響入面，因為加左料，令響鈴相對厚身好多。我地仲叫左兩杯特飲，水蜜桃梳打同烏梅汁，食完雞煲飲一流，感覺下火不少。