春天 (已結業)

安排座位極之混亂, 有一個企係收銀處負責俾飛,叫飛同收錢既侍應, 飛號碼係手寫既, 我地一行3人拎左飛(45號)一路企係收銀處附近無行開過, 見個侍應不停叫2人枱, 我地前面有一枱同樣3個人(客人a)去問幾時有位,侍應話有人埋緊單下張到佢地, 等左陣叫佢地個號碼(43號)時有另一個拎左同樣43號飛既客人(4個人)(客人b)出現,侍應望一望自己張紙,就話應該係客人b先, 咁客人a話ok, 客人b入左之後好快有枱俾客人a。之後又係叫2人枱,連剛到既客人唔洗等即刻有位。 咁好啦, 再等左陣,個侍應跳左我地個號碼,叫下張48號飛4人枱, 咁我地覺得奇怪喇,無理由跳過3人枱姐,於是去問個侍應幾時到我地, 佢竟然話已經叫左過左喇喎, 佢仲要係串串貢既語氣, 我地話佢真係無叫過, 佢當時好不滿又黑面,話:得,下張俾你。當時佢個語氣好明顯係覺得我地搞事,唔想我地嘈, 唔覺得自己安排混亂有問題。我相信佢係以為個兩張43號飛, 其中一張係45號(客人a), 所以就話叫左,但佢又唔諗下個兩枱都已經入左去,又何來一枱拎住45號飛既客話未入呢。