Panash (已結業)

原本想去o既食店去唔到，所以响海港城裏搵食。估唔到是日大鄉里出城，唔知道 Panash 除咗賣麵包之外，原來仲開咗餐廳，唔通好搵o的？佢o既麵包就食得多，見餐牌o既價錢都可接受，又想試下佢地o既食物水準，所以就決定幫襯。1點50分左右先坐定，午飯時間差唔多完，所以人唔多。同太太倆個人都叫咗午餐：雞扒脆皮腸意粉、紅酒燴牛尾飯。餐包先到，餐湯緊隨其後。每人一片法包，一個小餐包。麵包同平日買到o既相似，質地比較煙韌，加上熱辣辣更好味。餐湯揀咗南瓜湯，一啲南瓜味都冇，味道都係麻麻地。雞扒脆皮腸意粉：雞扒大塊亦夠味，脆皮腸就只得半條，味道OK，意粉份量少，但煮得唔錯，起碼唔會煮得太腍。紅酒燴牛尾飯：個賣相只係一般，但味道竟然唔錯。而且牛尾炆得好入味之餘，仲帶有嚼勁。紅酒汁夠濃郁，送飯一流！餐飲要咗熱咖啡同熱檸檬茶。熱咖啡比較苦澀而且冇咖啡香味！？反而杯熱檸檬茶就幾好味，清得嚟又夠味。整體唔係差，只不過未夠好到要再幫襯，都係繼續買麵包算喇！