大戶屋 (已結業)

一個project的終結，最開心的，莫過於收到bonus的一刻，為左慰勞辛苦左咁耐既兄弟姊妹，是日我做一天大戶，請佢地黎大戶屋食個lunch。之前吃過一次大戶屋，感覺是唔算很貴，但質素算不錯，以日本菜黎講性價比高。早早訂左位，店員講明就算訂左位都要半數先入得，而且只留位10分鐘，想吃就要預時間了。我叫了個吉列雞扒飯併冷烏冬，印象中有朋友講過呢度既吉列雞不錯，果然無失望，雖不是吉列專門店，但吉列得黎完全無油，麵包糠炸得香口脆身，雞扒肉嫩滑，再點埋醬汁，真是一流，如果可以好似吉列專門度咁，飯、菜、炸物分開上會更加好。冷烏冬很彈牙，也沒有了冰鎮後過凍的問題，冷麵汁和蔥花等是自行溝配，無餸齋吃冷烏冬也很好味。同事吃的鰻魚飯，聞說也不錯，有機會再試試，畢竟鰻魚是我其一至愛呢。（如果你看得到的話）在此多謝各位兄弟姊妹辛勞的幫忙，project才得以完成，尤其是小弟入院和結婚那段時間，真是十二分感謝。