Thai Fire

同朋友一行三人嚟食lunch，每人一份lunch set，我叫咗馬來雞扒煎雙蛋飯。本身冇太大期望，但係實在太難食忍唔住第一次打openrice食評。首先個飯等咗25分鐘先到，另外兩個朋友都已經食完咁滯，都算，第一啖食塊雞扒，又乾又鞋，硬過我條命；白飯係半生熟嘅，根本未煮透；伴碟嘅羅馬生菜亦唔新鮮，明顯雪得太耐；唯一正常係嗰兩塊煎蛋。如果係茶餐廳價錢我都算，但你收$108加一俾啲咁嘅質素人？絕對有理由懷疑啲好評係買返嚟嘅。