讚好台灣

營業中

休息中

經過紅磡呢間讚好台灣嘅裝修好似幾舒服，又見到閒日都坐滿晒人，就決定試吓啦。嘢食方面都幾多選擇，有飯、湯麵、拌麵、小食同嘢飲。主菜我哋要咗兩碗蕃茄湯麵。我要咗鮮蕃茄豬軟骨湯麵，揀咗新竹米粉。個湯底超級濃郁，好香蕃茄味，米粉嘅份量都幾多，豬軟骨煮到好腍好入味，好好食。朋友就要咗豐盛牛肉麵，有金錢牛腱、牛腩、牛筋、花枝丸同貢丸，材料豐富。我試咗佢嘅牛腩，肥瘦均勻，好香牛肉味，朋友都好鍾意佢個湯底。小食要咗木魚酥皮蛋豆腐，係冷豆腐上面有皮蛋，仲有好多肉鬆同木魚，估唔到所有嘢都好夾，食落個口感真係好特別。另外要咗大鹽酥雞同甘梅脆薯。鹽酥雞賣相好靚，外面脆得嚟雞肉夠腍，如果可以再熱啲就好啦。甘梅脆薯係唔同嘅炸法，外脆內甜，上面嗰啲甜甜哋嘅粉同炸物真係好夾。飲品方面我想飲啲清新啲嘅嘢，所以要咗凍蜂蜜柚子茶，甜甜哋咁好解渴，同啲嘢食都好夾。朋友就要咗蜂蜜檸檬茶，都話好飲。見到人哋飲黑糖鮮奶好似都好好飲，下次一於試吓啦。