食力點心·雞煲專門店 (已結業)

朋友知我鍾意試新野，今日帶咗我去食呢間點心・雞煲火鍋😂聽個名勁怪，又點心又雞煲咁，到底夾唔夾架？！餐廳一出mtr站就係，交通都好方便。 我地叫咗$168個餐，點心、雞煲、野飲同配料都係任叫。一開始我地就叫咗胡椒豬肚雞煲😋胡椒味唔係好濃，又唔會好辣，好適合唔太食得辣嘅人，即係我朋友😂另外，雞係分開用盤裝著，方便我地先飲咗啲湯，再落雞一齊食。啲雞好嫩滑，唔會好硬，配合埋啲胡椒味，好惹味！😝點心有幾款唔同嘅餃類，例如：蝦餃，菜餃等等。而我就最鍾意食蝦餃，塊皮夠晒薄，而且啲蝦都好彈牙！😋食完雞之後，侍應就拎咗打邊爐嘅食物嚟，有好多款，例如：青口，雲吞，各種不同嘅丸類等。值得一提嘅係肥牛，唔會好似平時打邊爐個啲咁勁肥，油脂分佈得比較均勻！另外，佢地自家製嘅手打丸都好好食，一定要再叫。野飲方面，佢地有各式各樣嘅汽水供應。仲有酸梅湯提供，酸梅湯配打邊爐超適合，又可以清熱解渴👍🏻味道有少少羅漢果，飲落更加香，重點係唔會好酸，讚！最後，食完火鍋仲有甜點供應，係桂花糕。可惜我地一開始食得太多太飽，所以都食唔落桂花糕，下次一定要留肚試下先得～