麺屋武蔵虎洞 (青衣城) (已結業)

好耐冇去呢間拉麵喇，原因係佢啲麵都幾……普通，價錢同出面比較係平10蚊左右，不過出面好食嘅拉麵真係好多，所以都好少再黎食，咁岩今晚大少話想食拉麵，於是就去返呢間，近近地呀麻！星期一唔洗等位，仲有卡位坐，幾好，一坐低見到新出一款沾麵，仲要係香菇濃湯，一於試下佢，85蚊一碗，加5蚊有半隻蛋，加18蚊仲有個薯仔南瓜雞肉沙律！雞肉沙律嘅南瓜好甜好食，但係薯仔呢……好爽口囉，好似未煮熟咁，而且冇薯仔味架喎，但整體都算好食，同埋都算多嘅！主角出場，一黎到已經聞到好香菇味，如果鐘意菇嘅朋友都真係要試，而佢個麵上面都有三款菇，仲要係用牛油，黑椒炒過，好香口，個湯係勁濃，雖然偏咸少少，如果唔浸咁多都好好食，香濃菇味，真心覺得好食，不過我地個湯唔熱嘅，之後都聽到好多客要佢地翻熱個湯。到我地走時見到其他人個湯係有煙出，希望佢地會改善一下。另外有樣嘢，之前黎幾次都覺得好熱，經理仲同我地講，係個商場冷氣問題，而且佢地都知出面食拉麵應該係俾冰水，而佢地只係俾熱茶，今次黎啲茶就冇咁熱，不過我都係食到出汗。