春天 (已結業)

將軍澳新都城呢間西餐廳開咗冇幾耐，一直都好想去試，今日終於有機會同屋企人趁放假去食，六點幾已經好多人排緊隊，呢間餐廳似乎幾受歡迎喎。餐廳嘅裝修風格活潑，紅紅綠綠色彩豐富，俾人耳目一新的感覺。坐低就每人叫咗一個set，12安士美國肉眼扒真係好巨型，足足有一隻手板咁長，厚大概1.5 cm。我哋叫咗五成熟，又真係做足喎，好多餐廳都唔會咁細心將烹調時間調校得剛剛好。輕輕切開牛扒就見到粉紅色嘅中心，裏面好juicy，加上邊緣嘅少少脂肪，入口好rich 好香口，牛味幾突出。意粉嘅份量都唔少，食完成個餐真係好飽。另外仲叫咗個至尊海鮮拼盤套餐。餸菜好豐富，有黃金扇貝、芝士煙肉焗蠔、香煎𩶘魚、煎大蝦、忌廉芝士焗蟹肉撻，份量相當多，蟹撻外皮鬆脆，有好多層酥皮，食落唔油膩。最好食恍然係最簡單嘅煎魚，外皮真係好香脆，裏面鎖住肉汁，整條魚嘅鮮味都好突出，雖然成個餐加一之後都要120幾蚊，但係真材實料。