十十川滬料理 (已結業)

平時成日都好想食川菜，不過男友比較怕辣，食啲好純正嘅四川菜佢就無乜食物可以選擇見呢間餐廳提供四川同上海兩個菜系嘅食物，令佢除咗辣嘅嘢食之外都有多啲其他選擇，地點又咁方便，即刻bookmark咗要同佢嚟~ 整體食物水準唔錯，酸菜魚嘅魚片採用海鱸魚，無腥味之餘夠滑溜，餐廳採用嘅粉條唔係平時食開嘅粗薯粉，而係一隻幼身啲煙韌啲嘅粉，令我覺得幾有新鮮感，味道質感都唔錯而成餐令我最有驚喜嘅係酥皮鳳梨奶黃窩餅，鳳梨味非常香濃，個皮熱辣辣好鬆化，食落有幾分似鳳梨酥嘅感覺，值得一試最後見大部份人都係叫任食火鍋，搞到我都好想下次黎試下~ 值得一提嘅係，我哋係平日晚上七點入座，臨走嗰時差不多八點三，餐廳就多咗好多人，所以想食嘅話建議早少少黎就應該唔使等位~