LAB10 (裝修中)

其實平時甚少食韓式燒肉，不過經常喺朗豪坊行過見到呢間以實驗室主題為裝修嘅燒肉店覺得幾特別同吸引，上網睇原來更加標榜「無煙韓燒」，唔怕食完會好大浸燒肉味。店內以放題形式供應燒肉，設有不同價位選擇，豐儉由人。🌟sᴜᴘʀᴇᴍᴇ ʙ sᴇᴛ $298呢個價錢已經包咗豬牛雞肉，仲有自助區加無酒精飲品。用QR code自助下單，限時90分鐘但上菜速度很快，唔使擔心食得好趕。-自助區主要擺放沙律、前菜、蔬菜、炸物、甜點兩款，有棉花糖同布朗尼。個人最喜歡加咗蟹柳絲、青瓜絲、蟹籽的椰菜絲沙律，夠曬豐富，口感清新又可以解解膩。肉類方面首先會有個牛拼盤，包含咗各款不同部位嘅牛肉，例如有安格斯牛板腱、牛肩肉、牛脊肉、一口牛、厚切牛舌等。當中個人最喜歡韓式梨汁牛五花，口感軟嫩又唔會太肥，薄切關係燒兩燒好快食得。海鮮方面有廣島蠔、蜆、虎蝦、魷魚，雖然選擇唔多但係質素都唔錯。飲品方面除咗可樂仲可以選擇唔同口味梳打，例如有士多啤梨、青檸、青蘋果、熱情果、菠蘿，也貼心地設有少冰少甜選項。