十二味 (如心廣場二期)

營業中

休息中

係呢段人人都戴口罩出街嘅日子，個個都盡量避免出街食，難得今日有機會出去聚下，真係要感恩。於是近近地，係荃灣揀左間未去過嘅餐廳。由於大半年前喺深圳食過酸菜魚，真係一試難忘。一直對於酸菜魚嘅味道念念不忘，今日終於比我搵到機會喺香港回味下酸菜魚嘅味道。酸菜魚真係要有少少辣先至好味，由於唔係食得咁辣，就揀咗最小既小辣去吊下味。湯底辣得來有種麻麻地又酸酸地嘅感覺真係好過癮。主角魚肉切得厚度適中，起晒啲魚骨食落去方便之餘仲啖啖肉，肉質嫩滑唔鞋口。除左酸菜好開胃之外，仲有萵荀做配菜，爽口得黎又有多種既口感。配埋闊身嘅薯粉粉條真係兩個人都夠晒飽肚，粉條晶瑩通透，煙煙韌韌嘅口感真係我既至愛。另外仲叫咗個川式口水雞，賣相非常得體，將啲雞件排成一個半球體，都幾花心機。雞件少辣地，肉質嫩滑，都唔錯。抗疫期間既閒日晚市都座無虛席，可想而之呢間酸菜魚嘅魅力所在。價錢合理，終於唔使北上都隨時可以食到酸菜魚嘅味道。