四季文昌 (已結業)

今晚我哋就去四季文昌食椰子雞煲！四季文昌就喺金巴利道上面，佳記隔離上一層，非常易搵！呢度地方好大，座位闊落舒適；裝修頗為有格調，感覺同大陸椰子雞店幾似，乾淨程度更勝香港本地雞煲店！牆上裝飾字句抵死啜核，我幾鐘意呢句“別跟我談感情，談感情傷錢”。來到呢度梗係點返份原味海南椰子文昌雞先。阿姐先落椰子水，水滾就幫我地落雞，然後用沙漏計時，沙盡之時就食得，大約7分鐘！先呷一口椰子雞湯，相當清甜！雞肉放湯滾完都仲係好嫩，點埋個用新鮮沙薑金桔而製嘅醬油，幾鮮味！平時就食得濃味雞煲多，呢種椰子雞清清哋嘅食法岩哂我！我哋消滅完啲雞之後就嚟食牛喇，極上和牛拼盤有齊日本同澳洲和牛，又有加拿大牛舌同安格斯牛柳，一次過食勻5款香濃牛味又嫰嘅靚牛！另外點左幾款配料，設計幾有創意。呢度仲有唔少椰子特飲，今次叫左個菠蘿椰子特飲同埋椰青！個椰青細細個清清少少甜，係椰青殼上燙上食店logo，插埋紙牌，賣相即時提升！最後嚟多個臘味芋頭煲仔飯，細份夠4人用，好多臘味，最正係有埋飯焦！好滿足呀！飽到食唔落甜品，其實我仲好想試埋佢個椰子雪糕！