四季文昌 (已結業)

秋風起，勾起了友人食大閘蟹的意欲。這些機會，自然不屬於我。要大家都食得開心，我哋揀咗一間又可以打邊爐，又可以食大閘蟹的火鍋店。位於旺角的四季文昌，面面都幾精緻，店內的格局都幾有特色。小店以椰子文昌雞煲作招徠，每台都預先安排好一鍋濃郁的椰子湯，用料十足。而佢哋係醬料方面亦都非常認真，有三款不同的醬料，全部自家製，唔係一般可以買到的豉油同醬汁。椰子雞湯，除咗個湯之外，雞當然都非常重要！雞肉係同平時的有點不一樣，肉質好結實，但又嫩滑，好有口感，而且雞味亦十足。吸收盡椰子湯的精華，甜甜地，令人停唔到口。至於朋友仔的大閘蟹，賣相唔錯，都有幾多蟹膏。由於我哋揀咗二人套餐，內容都幾豐富，每種食物都能夠淺嚐。當中令我哋比較驚喜的，就係安格斯牛肉。冇諗過套餐中的牛肉都可以咁高質，每一片的肥瘦分佈好均勻，啖啖滿滿的脂油香味，而且牛肉味亦都好濃郁。套餐當中都有幾款自家手工制餃子同丸子，加入左蟹肉同蟹膏的元素，幾特別。海鮮就不過不失。蔬菜籃的內容都幾豐富，而且蔬菜好Fresh。二人套餐，並唔係用一個烏冬塞飽我地。套餐中最後的主食係風味十足的蠟味煲仔飯。秋意盈盈，實在令人滿足又感動。