果子｜海南雞飯·喇沙摻摻 (啟昌樓) (已結業)

早幾日踩單車去大埔，經過見到呢間新加坡菜個喇沙摻摻好吸引，所以就同朋友入咗去食。海鮮喇沙摻摻勁得意，佢係油麵+米粉，每一啖都有2種口感，米粉索晒啲湯，油麵中和返個口感。湯底都好出色，湯底嘅香辣、椰香同海鮮味混合平衡，個湯好好飲，仲愈飲愈開胃。豆卜索晒湯，每啖都有湯。蝦同蜆都好有鮮味，昇華咗個湯。魚蛋都好彈牙，有魚香味，又唔會太咸。整體成個麵好香口，份量都好多好大份。海南雞飯啲雞好嫩好滑，雞油飯勁香噴噴，啲飯仲要係粒粒分明，配埋啲嫩滑雞一齊食，好香口好惹味。仲有3款醬比我點，包括黑醬油（甜甜哋）、薑蓉、秘製橙醬（勁開胃勁惹味）。炸蝦餅蝦味好香，點酸辣醬絕配，炸得好脆。檸檬薏米水一飲落就覺得同平時餐廳飲嘅唔同味，原來係果子自家製，每次都煮幾個鐘，逼咗薏米真正嘅香甜味出嚟，口感仲好好。