OPPA韓國燒肉店

營業中

休息中

好耐都無食韓燒啦，今日心血來潮搵間韓燒食下先，搵到呢間叫Oppa嘅韓燒，唔知點解通常叫得Oppa都覺得一定好食！呢度有套餐，又可以散叫，如果過晚上9點半仲可以宵夜套餐，都幾抵食㗎。牛肉都有好幾款，如果想試多啲唔同嘅款式，其實可以揀個牛氣沖天和牛拼盤，而我哋揀咗個Oppa必食推介 - 美國Prime安格斯肉眼扒，肉嫩多汁，有好香嘅牛味，油脂分佈平均。煎香後點少少麻油或者肉醬汁就更加美味！五花腩同樣都係Oppa 必食推介，唔會過份肥膩，肉同脂肪比例分佈平均，豬肉香口。店員仲會好細心幫你煎，保證煎到timing啱啱好。啲肉仲可以用生菜包住嚟食，如果嫌太過dry可以加少少芽菜、泡菜、海帶、蒜、醬汁包埋一齊食，就有多一種唔同嘅口感。如果生菜唔夠仲可以無限添㗎。原粒帶子大大粒，又鮮又甜，加少少檸檬汁🍋仲更加帶出其鮮味。鐵板上有個位置落泡菜同蛋漿，店員會免費落一次，如果仲想再添，可以加$18。食韓燒又點可以唔飲嘢呢，朋友要咗罐可樂，而我揀咗罐韓國粒粒提子汁，幾香青提味，仲有一粒粒嘅提子粒，幾有咬口。