Operetta (已結業)

不嬲都唔熟PP，呢個商場似乎冇咩食咁，除非去附近酒店。求其撞入一間諗住快快趣食個飯就走，見呢間門口望入去幾好feel就試下啦。個鋪分兩邊，近門口係高枱for飲野，裡面先係大枱for食飯。百幾蚊一個意粉/pizza都唔意外，唔係特別貴。餐包暖暖地，油油地...叫左個Caesar，同佢講share佢會同我分兩碟上，又幾貼心。生菜都爽脆嘅，雞肉普通啦，但點解佢會落左啲魚乾.... 無端端有啲咸魚喺度唔知想點。呢個pizza上碟嗰下我都有啲愕然，雖然係我點嘅😓賣相都幾唔吸引下，食落個味都ok嘅，個cheese味道好出，茄子菠菜都係我鍾意嘅食材，但個批底吸哂油食食下係有啲滯。呢個咁嘅cabonara又係嚇親我，啲意粉咁粗咁似油麵嘅？？啲意粉未煮透，中間硬硬地，上面啲洋蔥唔知佢點整，但望落同食落都好有乸埋一嚿嘅膠紙嘅感覺....個汁又稀，所以食落冇乜味。$160係絕對不能接受。加多兩杯啤酒埋單$660，食物質素都幾令人失望，環境同服務都唔錯，有機會再嚟都係飲野算咯。