大門食堂 (已結業)

沙田禾輋 AEON 超巿旁邊的食街，好耐無見過揾食人龍，當目擊大門食堂外有隊伍，確實嚇到心都離一離。大門的食品價錢由 20 元的叉燒飯，至近百元的西冷扒餐都有，全日免加一，食客包羅一家大細、情侶及單人匹馬。 跳過拉麵，選吃日式漢堡扒定食跟醋汁（48元）及吉列豬扒定食（45元）。兩個餐均有麵豉湯、凍豆腐及白飯。吉列豬扒需時製作，這天等了逾 15 分鐘才上枱。　論賣相，兩餐的實物版明顯有別於餐牌相片；論味道，OK 喔。漢堡扒並非超巿雪櫃貨式，厚身中藏肉汁，有嚼勁，配醋同吃份外醒胃；薯角連皮炸，份量多，帶美國薯仔的香，可惜已變涼，不脆口。食吉列豬扒前，先記住這是 45 元的貨式，如果硬要將它跟過江龍專門店相比，必定失望。大門的豬扒屬全瘦，絕對談不上軟熟或入口即溶，反而欣賞炸漿做得薄身鬆脆，椰菜絲的沙律汁夠清新，加埋有大大件鮮檸檬供自行揸汁，整體而言，物有所值。