泰星匯泰國菜

營業中

休息中

朋友地瞻介紹，話呢度的食物幾好食，價錢又得宜，同4個朋友行完葵涌廣場，就決定過嚟試下，喺大排檔、打冷林立的葵芳圍一帶，係一個幾好的選擇。店面雖不太大，但格局企理，一行入去就有種泰國的家庭餐廳味道，老闆娘係泰國人，同老闆一齊招呼人客，好好人，仲送左個泰式鳳爪比我地。椒鹽軟殼蟹夠辣，有大量洋蔥、青蔥、乾蔥、青紅椒配料，送酒一流，有別於街外港式的乾身做法，好食。泰式魚肚羹湯羹唔會太杰身，足料，有筍片、魚肚、冬菇、粉絲、雞絲，最驚喜就係最底有半隻烚蛋，味道同泰國食嘅一樣，問返老闆原來所有廚都係泰國人，所以味道方面都會跟返泰國地道。黃金咖哩扇貝黃咖哩好香，同咖哩炒蟹個咖哩一樣，加蛋炒的。扇貝不老身，無煮過龍，好食，配埋蒜蓉包一流。老闆話個黃金咖哩魚都好多人食，係成條魚起肉上，下次一定嚟試下。香茅蝦味道可以，夠乾身，唔會太油，係不錯的頭盤選擇。泰式炒生菜外表平平無其，但夠鑊氣，好過好多大排檔、小菜館。飲埋泰國啤酒，埋單490，抵食，下次再嚟一定再試下其他菜式。