影片
更多
2013-09-06
1665 瀏覽
前陣子Auntie R唔知喺邊本雜誌度睇到「留家廚房」一編專訪，得知餐廳母店其實位於天后，老闆為姓劉o既父子，最近就喺灣仔W Square開設分店。因深被報導同圖片吸引，所以就約埋肥肥家族及姨丈一家去飲茶試吓係咪真係咁堅 ！W Square入面有好幾間餐廳小肥都幫襯過，「留家廚房」可以話係當中最光猛闊落o既一間，可能同其牆身及枱布都以白色為主有關。我地一入門口已經有兩三位服務生招呼我地，帶位、開茶、推介食物、落單、換碟，樣樣周到，落力友善，真係值得一讚再讚 ！我地八個人飲茶，除左叫咗一啲傳統點心之外，亦有試「留家廚房」獨有o既菜式： 留家煙燻雞（$170/半隻；$330/一隻）：哥仔介紹此味為餐廳名菜之一。留家煙燻雞連雜上碟，要讚o既係煙燻味唔會太濃，可惜雞胸偏嚡，而且唔夠熱，感覺好似啱啱喺微波爐叮返出黎咁 ，更令小肥質疑會唔會係隔夜餸呢？！ 香滑豬潤腸粉（$42）：豬潤雖然唔粉，可惜偏乾，唔係好夠香滑囉！ 脆皮松露珠（$38/籠；$13/隻）：所謂脆皮松露珠其實係用煙肉、蘑菇及松露油造出o既咸水角。松露珠皮脆煙韌，其煙肉蘑菇餡加上松露油o既點綴尤其香口 。以「珠」o既諧
W Square入面有好幾間餐廳小肥都幫襯過，「留家廚房」可以話係當中最光猛闊落o既一間，可能同其牆身及枱布都以白色為主有關。我地一入門口已經有兩三位服務生招呼我地，帶位、開茶、推介食物、落單、換碟，樣樣周到，落力友善，真係值得一讚再讚 ！
我地八個人飲茶，除左叫咗一啲傳統點心之外，亦有試「留家廚房」獨有o既菜式：
留家煙燻雞（$170/半隻；$330/一隻）：哥仔介紹此味為餐廳名菜之一。留家煙燻雞連雜上碟，要讚o既係煙燻味唔會太濃，可惜雞胸偏嚡，而且唔夠熱，感覺好似啱啱喺微波爐叮返出黎咁 ，更令小肥質疑會唔會係隔夜餸呢？！
香滑豬潤腸粉（$42）：豬潤雖然唔粉，可惜偏乾，唔係好夠香滑囉！
脆皮松露珠（$38/籠；$13/隻）：所謂脆皮松露珠其實係用煙肉、蘑菇及松露油造出o既咸水角。松露珠皮脆煙韌，其煙肉蘑菇餡加上松露油o既點綴尤其香口 。以「珠」o既諧音「豬」作此道點心之外形，非常趣緻獨特，真係有心思 ！
筍尖鮮蝦餃（$32/籠；$8/隻）：蝦餃外表已經頗為缺乏營養，點知媽咪、表妹、同姨媽三個人好彩到食中一籠個心仲未解涷o既蝦餃 ，咁好明顯蝦餃並非新鮮啦！食點心o既地方居然連蝦餃都做得唔好，喺小肥心目中「留家廚房」頓變成「流料廚房」 ！哥仔同經理知悉此事，立刻自動同我地換過一籠，服務態度極為誠懇，可算係不幸中之大幸！
山竹鮮牛肉球（$36/籠；$12/隻）：大肥爸爸講過，食山竹牛肉最緊要係襯熱食，因為牛肉涷咗就會硬！大肥第一個夾，覺得牛肉球只熟和暖，味道雖然正常而且未變硬，但一定要扣分 。
蟹籽燒賣皇（$32/籠；$8/隻）：燒賣個問題同山竹牛肉一樣唔夠熱，當然隻蝦同蝦餃入面嗰啲一樣都係雪藏啦 ！
上湯煎粉果（$42/籠；$14/隻）：煎粉果個餡同蝦餃嗰個一樣，而且層皮硬咗少少，小肥贈佢兩個字「唔掂」！臘味蘿蔔糕（$28）：家中嫲嫲煮蘿蔔糕極有心得，所以肥肥家族食蘿蔔糕好講究！「留家廚房」o既蘿蔔糕唔合格原因有三：一，唔夠熱；二，煎得唔夠燶唔夠香口；三，臘腸味太濃因而蓋過哂啲蘿蔔味 ！
蘿蔔絲酥餅（$36/籠；$13/隻）：蘿蔔絲酥餅外表橙色得有點異常，咬落鬆化，個餡就過得去啦。
梅菜蒸芥膽（$88）：表妹話「OK，正常菜一碟囉」！豬潤燒賣皇（$38/籠；$19/隻）：豬潤燒賣同豬潤腸粉同樣都係個主材豬潤過熟，唔夠肥美。
苔條九肚魚（$78）：招牌小食之九肚魚魚肉嫩滑，配上海苔炸製，煮得好香脆鬆化 ，大家不妨一試！
魚湯海皇宮麵（$48/位）：$48細細碗，感覺少少貴，不過都算足料，有菜有蝦有帶子有冬菇，幾有睇頭，加上魚湯香濃甜美，如果$88有一大鍋小肥一定會食得開心啲 ！
乾炒牛河（$98）：家中姨丈最愛吃乾炒牛河，去到邊就食到邊，真係可稱得上為一位「乾炒牛河專家」 。姨丈成日都話，乾炒牛河看似簡單，但其實好考功夫！XO仔個人覺得乾炒牛河好油，所以極少食，不過當日同乾炒牛河專家姨丈都一致裁定「留家廚房」o既乾炒牛河唔係好得！雖然牛河炒得唔係好油，可惜毫無鑊氣，味道欠奉，乾炒牛河專家絕不推介 ！
其他：茶錢（$15/位）
鮮蝦腐皮卷（$38/籠；$13/隻）
珍珠雞（$32/籠；$16/隻）
蜜汁叉燒包（$25/籠；$9/隻）
家鄉粉果（$39/籠；$13/隻）
蟹肉瑤柱灌湯餃（$45）
蜂巢鮑魚盒（$48/隻）
「留家廚房」地方雖然舒適，服務亦好周到，可惜雪藏蝦餃令小肥印象太過深刻！連飲茶主菜之蝦餃燒賣都唔掂，劉家的廚房似乎頗為流料，每位要成二百蚊食啲雪藏點心，試問小肥又點會覺得抵食呢 ？！
張貼
