閨•家 (西九龍中心) (已結業)

成日經過西九龍中心都見到排晒隊嘅餐廳，今日見少有地少人啲，於是就把握機會去試吓啦！🤤呢到主打住家飯，價錢都十分之親民同住家feel! 飯餐連湯都係講緊50蚊左右，真係抵過自己煮啦。唔同星期日子仲會有唔同嘅湯水，唔會飲死同一種。湯幾清甜亦都有少少湯料，飲完無口渴，讚！柱候牛腩筋飯，牛腩筋同蘿蔔都好入味🤤個汁味道比一般食店清，鍾意食清淡啲嘅朋友啱曬，成日街啲野太重口，呢隻味比較噤食。香煎蓮藕餅豬扒飯都好好味，豬扒有用香茅醃，好入味甜甜咸咸咁。小食就叫左炸饅頭同埋燒豬頸肉，小食價錢非常之抵，岩曬食正餐都唔夠飽嘅朋友！Overall性價比高都無得再高，唯一係餐廳環境少少細，可能坐嘅時候要將就下。