古早牛肉麵 (已結業)

最近好想食台灣嘢，所以就試吓呢間古早牛肉麵☺️佢哋嘅裝修都令我諗返起台灣嘅早餐店，未有得去旅行都可以回味下台灣感覺～喺門口店員已經好主動上前招呼我，所以感覺真係好親切😆見店員有時都會同其他客人閑聊下，感覺好warm～我今次嗌咗一個鹽酥大雞扒肉燥飯（$60）同埋輕芝士岩鹽奶蓋朱古力（原價$29，跟餐減$10）。其實除咗滷肉飯，佢都仲有其他選擇，例如拌麵、牛骨湯米等等，不過我今日比較想食飯😆個雞扒肉汁多，唔會只係勁多炸皮同好少肉，真係值得一讚😄個肉燥就比較普通啲，不過都好食，唔會話太乾。杯輕芝士岩鹽奶蓋朱古力都幾特別，個奶蓋鹹鹹地，中和返個甜味☺️佢係特別有一個輕芝士岩鹽奶蓋系列，所以大家都可以嗌吓其他combination試吓！