古早牛肉麵 (已結業)

上星期有事出深水埗，眾所周知深水埗有大量地踎小食店，本來打算隨便食d野就算，但大熱天時企街咬小食真係搞唔掂，食龍肉都無味。去到黃金對面見到有間幾新淨舖頭食台灣野，店面企理，二話不說走入去試下先！店內掛左好多台灣得意標語同掛畫，加上夜市小食檔燈箱配合埋工業風裝飾，成件事RAW得來又好有風格。坐低後檯面畫紙落單，叫左個紅燒半筋半肉麵試下先。等左十分鐘都冇就上菜了。侍應一放低就聞到湯底香，好想即刻捧起個碗飲呀！湯底入口香醇微辣，但又唔會油膩同過份重味，因為每啖到細味到湯底落足心機嘅香料味，飲得好舒服。牛肉同牛筋都炆煮得好稔好入味，入口即化，基本上連咬都唔洗點用力，真係好感動；份量都好慷慨，一個字抵呀！估唔到隨便搵間小店入去都有驚喜。食完個麵有d唔夠喉加多個炸雞排，呢個好快五分鐘左右已上座，新鮮熱辣又大件，又唔會有坊間炸小食店肥膩，值得推薦！