豐鍋雞煲 (荔枝角道) (已結業)

去完深水埗買嘢，就同老公去食好西，老公話好耐無食佢至愛嘅雞煲啦🐔，就揀咗間喺荔枝角道嘅雞煲，門口仲有對翼可以影下相打下卡添。 一坐低，我哋先點咗個豐鍋招牌麻辣雞煲半隻🐔，都只係$178，有幾種辣度可以揀，有大、中、小、BB辣🌶，甚至走辣都可以，不過老公鍾意食辣，但我又好怕辣，最後佢就我揀咗個BB辣，辣度啱啱好，有大量芫荽、乾蔥、蒜🧄，味道唔會太鹽，非常之惹味。雞肉亦都好嫩滑，好入味！ 食完雞煲就開始打邊爐啦，我哋點咗必叫嘅頂級安格斯牛小排🐮，肉質鮮美滑嫩，油花分佈均勻，鮮嫩多汁，非常美味。 手打四寶丸🍡有蝦丸、鯪魚丸、墨丸同墨汁墨丸，粒粒都係手打㗎，爽口彈牙，真材實料，每粒仲有啲蟹籽喺面頭，增加口感。 即炸紫菜響鈴好大件，食落脆卜卜，仲有紫菜喺入面，感覺更加香脆。 雜菜籃蔬菜🥬新鮮爽口，色澤翠綠。 打邊爐梗係要一邊食一邊飲啦，點咗一杯玫瑰柚子，一杯水蜜桃梳打，味道酸甜適中，冰涼可口🍹。