百好名宴 (已結業)

同朋友經過始創中心，想搵個地方坐低傾下計。心諗飲茶可以坐耐啲，一致決定飲個下午餐。喺始創中心地下有幾個酒樓廣告牌，幾間都飲慣飲熟嘅集團酒樓，只有呢間未聽過佢名。而OPENRICE只有五個食評，但同朋友都冒險一試。到達五樓，長長嘅大走廊，只得一人，就係前台嘅服務員。咁局勢，真係想掉頭走，朋友話姑且一試，好，就試吓啦!幸好入到去大堂，都有一半食客，不覺冷清。等左十分鐘先有人黎問飲咩茶。 睇下點心紙，選擇好多:價錢都算合理:排骨蒸陳村粉$17.8，都幾大碟，夠晒味。陳村粉同排骨夠份量，味道好。百好燒賣皇$19.8，熱辣辣，好多蝦肉同蟹籽，但賣相一般。正宗燒鵝湯瀨$23.8，份量唔細，只係個碗太大。黎到時個碗邊污糟左，有手指印。但味道唔錯，燒鵝燒得皮脆，鵝亦厚肉。呢間酒樓都唔錯丫，靜靜地，方便傾下計。