千鍋居 (已結業)

第一次寫食評，因為發現自己唔覺意做左「白老鼠」！ 諗落幾得意，所以學人寫下 事緣一行三人途經佐敦 + 唔知食咩 + 行過見到新開張….所以唔打唔撞入左去「試菜」！人唔多，聽經理講只係剛剛開，不過反而幾舒服，咁就坐低啦，好彩點左幾樣野都唔錯，我最滿意既係....蟹雞煲： 我淨係食雞，雞肉吸收蟹既鮮味，讚！友人食蟹，佢話肉質幾「實淨」，都OK。不過最精彩既，就係差唔多食完個時，經理問「駛唔駛加個烏冬試下」，d烏冬吸晒雞蟹既精華，結果….連汁都掃埋 ，非常邪惡既食法 椒香桂花魚：好多魚片，好滑，全部無骨，懶蟲如我至愛。少少花椒味，又唔太辣。蒸魚豉油甜甜地加些少麻辣，結果...又忍唔住叫多左碗飯 可能新鋪關係，服務態度幾好。經理仲不斷需問我地意見，突然變身VIP 今次算錯有錯著，下次有機會再試下打邊爐啦!