京滬村 (已結業)

今晚帶 daddy 嚟試吓喺元朗嚟講唔係好多餐廳有得食嘅片皮鴨。韭黃炒鱔糊，上海菜嘅濃油赤醬，加埋揀手以及為數不少嘅鱔碌，經過爆炒之後香氣撲鼻，份外惹味，加埋碗白飯，無敵。四川擔擔麵，呢間餐廳嘅擔擔麵有好香濃既花生味，啱哂鍾意食花生嘅爹哋，連平時食麵唔會飲埋啲湯嘅佢都幾乎將成碗湯清哂，麵質方面爽口彈牙，特別鐘意佢面頭嗰啲肉碎無乜肥膏，咁就可以留返啲膽固醇俾一陣個片皮鴨啦。千呼萬喚嘅片皮鴨終於登場，侍應姐姐將原隻片皮鴨推到我哋面前，再喺我哋面前逐塊逐塊咁樣片層皮出嚟，首先俾咗四塊我哋，佢話呢四塊特別肥美要點糖嚟食，果然別有一番風味，剩低嘅一大碟就用傳統嘅方法嚟食，先將片皮鴨點滿片皮鴨醬，再夾多兩條京蔥同埋青瓜，用塊皮包住嚟食，鴨嘅油脂，京葱同埋塊皮相互配合，好好味啊。高力豆沙，臨尾以呢個咁美妙嘅甜品作結實屬最好不過，高力豆沙口感軟熟，蛋味香濃，加埋入面只有少少甜嘅豆沙餡，滿足嘅一餐就咁完滿結束。