霸嗎拉麵 (金巴利道) (裝修中)

平時晚晚排晒隊，今日專程下午茶時間嚟到，冇乜人，可以直入。餐牌封面非常吸引。點咗個辣豚肉味玉拉麵、辣唐揚炸雞同綠茶可樂。可能係我個人味覺唔敏感，呢支綠茶可樂真係唔係特別飲得出綠茶味，飲落只係好似淡淡地嘅可樂咁。主角拉麵出場。舊豚肉極肥，肥得好味冇乜所謂，但係佢得個肥字，肥嘅部份太軟，而且冇乜香味，食落只似一舊平凡嘅豬腩肉。玉子質素正常，冇乜特別。麵我點咗硬身，口感唔錯。但係食拉麵係要一口扯晒啲麵入口，並唔應該咬斷麵條，而呢度啲麵有時仲痴埋晒一齊，或者打晒結，令到人難以用傳統嘅日式食法去食。最後講個湯，個湯係真係濃到有醬醬地嘅質感，但係飲落其實個味又唔算太濃，只係係條脷上面有種厚重感。個味亦無特出之處，算係好飲，但未至驚喜。炸雞一上，未影相就食咗舊。炸得香脆，不過雞味不重。上面嘅辣汁值得大推，非常香辣。食落十分過癮。整體而言，只係普通嘅拉麵店質素。