知粥嘗樂 (已結業)

今日去咗炮台山嘅知粥嘗樂，試吓佢哋嘅砂碢粥同小菜。今日我就點咗鮑魚蝦蟹粥小碢，因為要等返啲位試小菜。小菜我就點咗牛根腩腸粉煲，其實一開始已經被餐牌上面張相吸引咗。小碢鮑魚蝦蟹粥非常有份量，而且亦都好足料！ 雖然餐廳提供拆蟹工具，但其實整隻蟹已拆件，好多蟹肉，方便周到。兩件鮑魚好彈牙，再加上唔少熟蝦，感覺上料多過粥。而牛根腩腸粉煲一上菜就滋滋聲，牛腩香味撲鼻。牛根同腸粉非常入味，餸粥一流！而呢度嘅紅豆冰係我飲過最香濃煉奶味，紅豆亦多，好正！呢間餐廳嘅砂鍋同小菜，水準比得上酒樓。