茶記冰室 (已結業)

父女檔諗住係提早做冬所以出街食好啲，俾茶記冰室嘅盞鬼菜單吸引咗入去~~ 環境寬敞，有別於一般嘅茶餐廳格局，裝修有玩味。 叫咗細羊腩煲，同冰鎮咕嚕肉。先上嘅係是日例湯，菜乾粟米鳳爪瘦肉湯，清清甜甜喎，味道佳，好滿意呢個湯。冰鎮咕嚕肉，真心，好食到不得了！每舊都麥樂雞咁大，仲要無骨❤ 外皮超脆口，醬汁甜酸適宜，又有提子、車厘茄同菠蘿點綴，好開胃，冰鎮完之後令到油炸嘅燥熱感覺消失晒，不愧為招牌小菜！初時仲擔心啲冰溶曬會浸到咕嚕肉唔脆，所以急急腳夾走上面啲冰，食到一半先發現個容器中間有一層冰隔，隔開冰溶出嚟嘅水，方便客人慢慢食，呢個設計亦不得不讚！再黎羊腩煲，呢個都大讚！羊腩炆得好淋好入味，羊皮羊脂入口係啖啖油香而唔係羶味；湯汁好濃，用黎撈飯更生色不少，滾生菜，生菜吸收曬羊腩煲嘅精華，就咁食都好正！而且羊腩煲好足料，有好多羊腩、腩皮肉😍 又有冬菇、腐竹、馬蹄、筍，仲跟一碟生菜，成煲分量好大， 一個細煲夠晒兩個人食。兩味菜皆十分出色，爸爸都話好耐冇食過咁有水準嘅餐廳，一定要介紹朋友黎食添。