燒烤堂 (已搬遷) 新店位置

華生今日帶我去果欄買水果，買完行返去旺角搵地方食嘢，行經長沙街見到有間串燒店，華生睇完門外餐牌就入咗去。店仔細細大約只有廿個位，可能啱啱先至開門，我哋係第一枱客。想食咩係點餐紙上面剔，今日我淨係負責食。先來杯青檸梳打消暑解渴，冰涼梳打，加埋清香青檸，口味清新又醒胃。蒜蓉燒廣島蠔香噴噴熱辣辣上枱，拎上來仲有吱吱聲，小心燙手呀。廣島蠔肉肥嘟嘟，好似生蠔一樣咁嫩滑多汁，肉質鮮甜，口感滑溜，加埋蒜蓉更加香。蒜蓉燒虎蝦虎蝦肉質結實彈牙，加入蒜蓉燒，鮮香惹味!泰式鹽焗馬友魚魚肚塞入香茅、辣椒、香葉等，然後用鹽焗熟，香茅味四溢，魚肉又香又滑，點泰式醬汁食更好味。麻辣蒜蓉茄子燒嘅火候啱啱好，軟腍濕潤，將茄子肉一絲一絲撕出嚟，撈埋麻辣嘅蒜蓉，十分惹味。手切雞腎爽口又惹味，正！羊架燒得焦香，無羶味，入口軟嫩多汁又美味。麻辣黑豚肉韮菜花串，燒韮菜花未食過，黑豚肉嘅油份滋潤咗韮菜花，燒完都依然青綠嫩口，連埋焦香脆口嘅豚肉一齊食，好食。地道牛肉串無食，不作評論。沖繩黑糖燒菠蘿香甜多汁嘅菠蘿被略燒過，上面淋咗黑糖，變成脆脆，黑糖焦香加上菠蘿嘅鮮甜，好食。又發掘到一間好味串燒。