隨變燒烤麻辣雞煲

營業中

休息中

朕對雞煲可為情有獨鍾，一日朕既隨從幫朕Check到，佐敦有間隨變雞煲，隨左有雞煲仲有燒烤，可以一次過滿足哂兩個願望，放是朕就一行四人黎到試佢一試！一入到去，朕就當然揀左個冷氣當風位坐啦，個阿姐聽到之後就陰陰咀笑，然後同朕講邊度都一樣啦，吓！一樣，唔係化！朕當然無理會佢，繼續坐冷氣位啦！呢度用電爐，無火煮食，雞煲上枱睇落比較稀，唔似一品個汁咁杰，個味就係偏辣，唔夠麻，個雞煲啲雞唔夠味，食落似煲湯雞。而手切本地新鮮牛頸脊，因為牛頸脊郁動較多，肉質細緻，結實，肥瘦適中，咬落質感同埋味道都比普通手切肥牛好得多。另外崩沙腩，牛味香濃。珊瑚蚌新鮮爽口。響玲卷同埋炸魚皮就有啲過氣，冧冧地。而鮮魚卜就最緊要記得篤爆，如果唔係當你一口咬落去既時候，你唔篤爆佢，就佢爆你架啦！！！燒烤方面朕就叫左燒煙肉蕃茄，煙肉香脆可口，蕃茄仔燒熟後依然多汁，而多春魚加左麻辣，一口咬落香脆，入面既春子在口內一粒粒爆開，加埋個麻辣既辣在口裏由內而外咁擴散，辣HIHI！最終，同個阿姐既預言一樣，坐邊度都無用，成頭大汗，亦都証明左食雞煲係幾大冷氣都無用既！！！（況且呢度既冷氣根本就唔夠！！！）－－－－－完－－－－－