漢和韓國料理 (已結業)

同朋友去左呢間漢和韓國料理食燒肉放題。店內環境寬敞，冷氣夠，光線雖然唔係光猛但柔和舒適，衛生情況都滿意，冇好油笠笠嘅感覺。除左韓式燒烤，仲有唔同款式食物，例如春卷、蝦片等小食，炒飯、三文魚、連豬腳薑都有，仲有壽司刺身，沙律吧，老火靚湯等等，特別想讚下佢三文魚供應，可以隨意夾又refill得快，能夠盡情地食。而三文魚質素不差，色澤靚夠鮮美，厚切有口感。炸物例如春卷、海鮮煎餅同煎堆等就麻麻地，粉太多加上凍左，我地嘗試放喺鐵板上焊熱一下，都係救唔返。不過蝦片係吸引小朋友嘅。另外，朋友見到豬腳薑好開心，豬腳同蛋都好足料，反而薑就唔多。燒肉方面，都係自助形式，食材種類多，有雞翼，牛仔骨，黑椒牛扒，龍利柳，豬頸肉等等，仲有新鮮蔬菜，應有盡有 。味道方面，牛仔骨好腍又多肉，味道帶甜，肉質嫩滑，唔洗點醬汁，已經覺得好好食。羊肉味道濃，喜歡食羊嘅可以一試。甜品選擇唔算多，都係水果、雪糕、桂花糕同牛奶布甸，奶味夠濃，入口嫰滑。雖然食物種類款式唔算好多，但勝在近屋企，又有free parking，價錢唔貴，大家今晚都食得好開心👍