52C Medium Rare (已結業)

今日去佐敦食晏，呢間52C Medium Rare第一個感覺好似文青cafe，但原來係食燒肉嘅。雖然地方唔算好大，但餐廳設有兩層，樓下主力做石燒同定食。裝修簡約舒服，採光度高，通風系統做得唔錯，食完燒肉都唔會一陣味，就算出面35度高溫，喺呢度食燒肉都唔會覺得辛苦。下晝行到攰仲可以入嚟飲杯特飲，食啲小食，傾下計都幾chill。樓上嘅網燒環境都唔錯，自助形式為主，鍾意freestyle嘅就啱晒。呢度嘅牛肉選用咗400日嘅美國殼飼牛，我哋首先選擇咗牛小排石燒套餐。牛小排屬於牛嘅胸肋骨部位，脂肪含量較高，充滿大理石紋，肉質鮮美。調味料有蒜蓉燒汁同黑椒鹽，不過我覺得靚牛咩都唔使落，食原汁原味就已經最好味。另外就選擇咗封門柳石燒套餐。封門柳其實係牛嘅橫膈膜肌肉，每隻牛只有一條，數量珍貴，肉味最重，油花就較少，口感更勝牛小排。套餐仲配有前菜沙律，係新鮮沙律菜配芝麻醬。餐湯係羅宋湯，酸酸美味又多蔬菜。白飯用上珍珠米，所以粒粒飽滿，配牛肉食真係可以食多幾碗飯。我朋友唔想飲凍飲，店員特登去攞罐冇雪過嘅茶，呢啲細心位值得加分。原來佢哋仲有外帶套餐，橫掂屋企有烤爐，下次可以嚟幫襯。