塩館 (已結業)

芥辣八爪魚，用新鮮嘅八爪魚刺身切粒，再混入餐廳特製嘅醬汁，入口新鮮爽脆，清新彈牙，喺微微嘅芥辣刺激下再加上點點嘅甜味，唔錯，咀嚼嘅後期八爪魚嘅筋性漸現。自家製小籠包（蟹），小籠包嘅口感彈牙，有啲似蟹籽丸，不過好明顯新鮮好多，外面包住脆卜卜嘅生菜，成個感覺好特別。地獄拉麵，點菜嘅時候侍應小姐已經警告咗我哋呢個地獄拉麵嘅湯底唔係人咁品，堅係地獄架喎，我持著自己食得辣照去，結果果然逼近我嘅臨界點，不過得嚟又好爽喎，佢嗰隻辣唔會一放入口就爆發出嚟，而係慢慢咁樣滲出嚟，仲好 long lasting 添，食到出一身汗，爽皮。黑松露帆立貝拉麵（麵豉湯），帆立貝非常鮮甜美味，個直徑足足有成三寸，黑松露味嘅拉麵都係第一次食，估唔到個效果都幾好喎，襯埋個麵豉湯底，有黑松露味又有麵豉味，大家都唔會搶咗大家嘅風頭，啱味啱哂我。