茶狼 (已結業)

是日同朋友行街行到攰，想搵果地方抖下，所以就入左茶狼飲杯野傾下計，一直都想試佢，因為聽朋友講果茶底唔錯幾好飲，今次終於有機會試啦。果時大約夜晚7點幾，因為係食晚餐時間加上放工時間，所以鋪頭完全冇咩人，位置好多，叫野飲都唔洗排隊。仲可以周圍打下卡，影下狼。入到去睇左下餐牌，見到居然有牛油果，二話不說就點左杯凍牛油果茉莉珍珠茶。見到凍櫃啲cake好似唔錯，但感覺牛油果都偏飽肚，所以下次再試。終於講到主角凍牛油果茉莉珍珠茶，先講珍珠口感，我覺得偏硬，要用多啲牙力去咀嚼，我覺得珍珠既口感有啲扣分。至於野飲方面，茶底真係好似朋友講既唔錯，好順喉。牛油果味唔係超濃，但會食到牛油果蓉，茉莉味好香，所以有啲搶左牛油果既香味，不過飲到好creamy 既牛油果，感覺似真係好食緊打蓉既牛油果，我非常滿意。叫左少冰少甜，甜度岩岩好，唔會太甜，冰唔會好多，飲完都冇冰淨低。整體黎講，野飲我好滿意，而且牛油果野飲出邊真係好少有，飲落都有驚喜。服務唔錯，店員都會主動問洗唔洗少甜少冰，有提醒到客人，呢下加分。