616牛肉火鍋專門店 (馬鞍山中心)

營業中

休息中

都已經好耐冇食616了，以前成日去食大埔總店，馬鞍山開咗食過一兩次就冇食好耐，今日想喺馬鞍山打邊爐，又唔想食放題，就嚟616啦。喺openrice book定位，有85折。一定要叫牛骨湯底，都食過其他湯底，但都覺得牛骨湯底好味好多，好濃好香。另外覺得一定要叫就係牛丸同烏冬，牛丸好彈牙，入面好多汁，而且超濃香牛味。烏冬有個手打烏冬，以前好似冇，係新加，而且平過稻庭烏冬，就叫嚟試吓，口感又幾好，都唔錯。叫咗牛駝峰、吊龍伴、匙柄、日本牛頸脊，牛駝峰最好食，最濃味口感又最好，另外全部都好食，都好濃香牛味，日本牛頸脊就最肥。叫咗飲品菊花桂圓露同玫瑰洛神花茶，不過其實飲咗好多牛骨湯，都冇乜點飲飲品。另外因為餐廳要收醬料費，記得出去攞醬料，任攞，而且有十幾款好多選擇，個牛肉汁都好味。