小火焰韓式咖啡廳 (觀點中心) (已結業)

最近迷上了韓國食物，於是一直同朋友周圍去搵特別既韓國餐廳，今次我地就去左呢間廣受好評既小火焰餐廳。到步時已經差唔多八點，人比較多，但唔洗等好耐已經可以入座，餐廳環境唔錯，裝修亦很有韓風味道。咁我地叫左幾樣野食同野飲，首先黎到既黎係藍柑白桃梳打賣相十分有趣，味道亦不錯，藍柑同白桃既味幾夾，酸酸甜甜咁幾開胃。另外到重頭戲 - 溶岩芝士炸雞麵包，上網見到人介紹已經覺得好吸引，親眼見到後更加覺得震撼。麵包有成個頭咁大，一切開個麵包D芝士就係咁湧出黎，D芝士好香好滑，配埋麵包簡直係一流，另外炸雞亦係超級好味，外皮炸到脆卜卜，入邊既雞肉都好嫩滑，絕對唔輸比韓國地道既炸雞。將炸雞點埋芝士黎食亦係另一種享受，絕對係芝士愛好者既天堂。雖然呢道墨魚汁青口刀切麵幾入味，D麵幾爽口，青口亦幾鮮甜，但食完岩岩個芝士炸雞麵包已經幾飽，最後食唔晒，而且兩者相比之下刀切麵比較遜色，但鐘意墨汁既朋友亦可以一試。整體而言，呢間餐廳既野真係幾好食，難怪咁多好評，絕對會再去。如果係鐘意芝士既朋友更加要去試一試呢到既芝士炸雞麵包，絕對會一試難忘。