皇后飯店 (已結業)

從來都覺得呢間餐廳好有特色，好高級，由細到大，啱啱出黎搵錢個陣都唔敢去食，而家做左咁多年野，終於試得到，但其實又唔算好很貴，係值得一試再試🤣menu黎講，唔算多野揀，但足以令有選擇困難症嘅我猶豫左好耐，（有限時架）最後試左個我喺俄羅斯未見過嘅炸肉卷。我覺得好值得試一次。第一，切出黎爆（牛？）油個下好正，第二，其實味道係唔錯架，不過我本人唔食得太多油，胃口又唔大，食到一半已經覺得飽，可能全舊都係肉。鍾意啖啖肉嘅朋友認真要叫。第三，應該係俄羅斯名物，叫黎打卡，當去左旅行都好呀！第四，擺明係功夫菜，除非唔係？！另外，食西餐，都必定叫嘅牛扒，煮得剛好，肉味又啱啱好，唔會蘇，肉質都好嫩好正，最驚喜係個粟米，超甜，必清！！圍觀四周，有3枱都係單人（男子）自己黎食，叫杯紅酒，勁chill! 唔知幾時先到我可以咁chill.話說食完之後嘅一個月，我就同左其他人再食，可惜冇影相。最印象深刻嘅係叫左我上次食唔到嘅蟹蓋，仲有青口，兩樣都係十分推介！