秋田火鍋海鮮丼浜燒專門店 (已結業)

因為工作關係要黎灣仔開會，開完會都成12點，所以諗住同同事食埋飯先返公司。可能因為時間尚早，好多人都未放lunch，所以都唔洗點等位。餐廳既佈置非常得意，好有日式風情，座位亦都好高私隱度，見客或者同情人相聚就最好不過。lunch set 唔算平，我地揀左泡菜豚肉鍋同吞拿魚雜錦魚生丼，餐牌設計都幾精緻。泡菜豚肉鍋：豚肉同蔬菜吸晒泡菜濃湯既精華後，真係格外好味，除左呢個鍋之外，個餐仲有白飯、味噌湯、沙律、蒸蛋同甜品。味噌湯落足料，有好多日式豆腐同昆布。落左柚子汁既沙律亦令我地食到好開胃。蒸蛋非常滑，仲落左好多日式魚蛋，非常滿足。吞拿魚雜錦魚生丼：一上檯就已經覺得佢好吸引，顏色鮮豔，有各式各樣既魚生，有蝦、蛋、吞拿魚、三文魚同青瓜，樣樣都好新鮮，飯方面係日本飯再加醋，整體配搭非常好。甜品方面，係雪糕黎既，有朱古力味同綠茶味揀，以我估計應該係維記。雖然百幾蚊食個飯有d貴，但係有好野食環境又好，間唔中食下都幾好呀。