盤子工房 (建生商場) (已搬遷) 新店位置

上個星期五同朋友去咗屯門建生邨呢間盤子工房食西餐，一去到見到個環境好靚，店舖裝修以木工為主，俾人個感覺好舒服，算係沙漠裏嘅一點綠洲。 睇吓佢哋個餐牌，餐廳都有心思，選擇唔少，最後我哋叫咗all day breakfast同埋炸魚薯條，另外我哋叫咗杯焦糖鮮奶咖啡同抹茶咖啡。先講個all day breakfast，份量真係好大，足夠兩個女仔食，擺盤亦都好靚，絕對嘅IGable。炸魚薯條雖然放喺小食區，但係份量都不用小覷。嘢飲方面，兩杯嘢飲都非常出色，好好飲，而且份量仍然都係大大杯，飲極都仲有，真係好滿足嘅一餐。焦糖鮮奶咖啡，估唔到佢嘅焦糖真係一大舊脆卜卜嘅焦糖快，俾人感覺有用心，而且佢撈埋鮮奶咖啡嘅味道真係好夾，好飲！抹茶牛奶咖啡同樣好飲，冇焦糖咖啡咁甜，但係就多咗抹茶嘅甘香味，出色。總結而言，店舖環境舒服，而且位置坐落喺屋村中，真係好難能可貴，住附近嘅朋友一定要試一試，如果住得遠都可以入去試一試。