Season Oyster & Wine Bar (已結業)

自問對港島區餐廳唔太熟悉，夜晚想西餐之餘，又想食到新鮮生蠔。偶然發現呢間西餐廳，價錢算係相當親民。-烤焗海鮮拼盤 $298拼盤份量算幾足，包括咗2隻芝士焗原隻龍蝦、2隻巴馬臣芝士焗扇貝、4隻蒜蓉翡翠螺、2隻牛油蒜蓉焗虎蝦、芝士黑松露焗大蘑菇。龍蝦鋪滿經烤焗嘅芝士，鹹香十足，如果龍蝦肉再多汁啲會更好。最為欣賞大蘑菇，汁多有口感。其餘海鮮香氣稍嫌不足，入口未夠惹味。-精選生蠔 $54/半打呢款生蠔體型較小巧，拼盤伴有海鮮醬蘸取。生蠔勝在夠新鮮，帶海水鹹香但不覺腥膩，適合驚腥味嘅人士食用。肉質嫩滑，入口滑捋捋。-明太子雞翼 $58/4隻一上枱已經傳嚟陣陣香氣嘅雞翼，外型飽滿焦脆。雞翼釀有明太子餡料，辣味唔算突出，只係增添咗少少口感層次。-菠蘿味手調啤酒 $58手調啤酒設有幾款水果口味，今次揀咗菠蘿味一試。雖然飲得出係菠蘿味，但水果比想像中淡，麥味反而更突出。面層仲有綿密泡泡，賣相幾可愛。-凍蜂蜜柚子蜜 $28表現正常嘅一杯特飲，拌勻後飲用都唔會太甜，潤喉清甜。