海言どんぶり専門店

營業中

休息中

今日一於食好啲，去咗中環呢間海言どんぶり専門店食魚生丼飯，入到去見到師傅喺吧枱後面專心準備刺身，已經感到好期待叫咗個海言廚師發辦魚生飯特上，一上枱已經震撼到我！成碗飯係層層疊疊咁擺滿刺身，賣相一流！啲魚片切得超薄超靚，師傅手勢真係一流。大拖羅油香入口即溶；中拖羅都係香濃滑溜，唔會輸畀大拖。金目鯛同真鯛新鮮爽甜，油鯛就肥美得嚟唔會漏，秋刀魚肉質結實爽口。最啱我心水係啲炙燒魚類，師傅用火槍燒到表面微微焦香，但裡面仲係保持住生魚片嘅鮮味，海膽同三文魚籽都係上等貨，海膽香甜冇腥味，魚籽有油香味重🥰另外仲試咗個江戶前散壽司，啲飯用紫菜、芝麻、薑蓉同赤醋調味，香噴噴又夠醋香。自家製腐皮同玉子都好出色。啲刺身一樣係新鮮靚料，擺盤勁靚。配餐仲有茶碗蒸同沙律，最後仲會上過麵豉湯暖吓個胃，都幾有誠意。最後重可以添飯，不過我實在食唔落啦！師傅嘅刀工、擺盤同選料都見到誠意，絕對值得等位入去食。下次一定會再嚟試下第日嘅時令刺身！