慕茶 (已搬遷) 新店位置

今日難得出去觀塘工作，當然約係觀塘返工既朋友帶路食好野。朋友介紹呢間午餐時間都唔算多人，餐廳環境又舒適，最重要係唔會太貴，飲品仲可以自助任添，唔錯。輕量級全日早餐 $66:有日式紫菜3.6牛乳炒滑蛋，香煎煉奶荷葉包，紅酒醋油粟米沙律，燒蕃茄，德國煙燻豬肉腸，份量都幾多，價錢比一般既全日早餐平。滑蛋煮到好嫩滑，唔會過老，燒蕃茄超大個，而且好香甜，唔酸，沙律菜新鮮清甜，豬肉豬就比較硬身，但都幾香，荷葉包軟硬適中，配上煉奶，甜甜地，口感豐富。蟹籽帶子抺茶鮮蝦忌廉意粉 $78:抹茶意粉第一次試，好特別，綠茶味好香濃，帶子煮到好嫩滑，鮮蝦有蝦味，而且幾爽口，蟹籽配埋意粉一齊食，增添口感之餘，整體好夾，咸香帶點綠茶既微苦，令人喜出望外既一道菜。另外lunch set包埋任添既咖啡同檸茶/水，咖啡仲係機沖，奶，糖和檸檬都係自行添加，唔會浪費，自己鐘意咩份量自己調教，唔錯。最後當然唔少得飯後甜品，lunch set包埋，真係好抵食，今日甜品係手工雪糕，玫瑰花茶口味，好特別，雪糕唔會太多奶，而且好香玫瑰花味，真係令人回味。朋友話呢間餐廳仲有好多手工茶味雪糕，有機會可以再試埋其他味。