莆田 (已結業)

今晚我們喺馬鞍山附近做完嘢之後去咗新港城中心睇吓有咩好食？行到去見到有間叫「莆田」嘅餐廳係食新加坡福建菜，而且仲獲得「米芝蓮一星」嘅殊榮，所以我們就決定入去食晚飯！一開始店員就攞咗餐前水果同餐前小食黑木耳畀我們！喺食完啲餐前小食之後，我們就叫咗阿元香草鷄係凍食，感覺好似食緊醉鷄咁，但肉質比較「粗嚡」！水晶豬蹄凍嘅質感相當爽滑彈牙，唔會好硬實實咁！包菜飯並唔係好似個名咁用椰菜包著啲飯，而係將啲椰菜切成絲，之後加入啲炒飯度，啲炒飯炒得比較濕，唔係好乾身，至於味道亦都係比較淡！莆田滷麵嘅味道都算鮮味，但麵質就比較腍身，所以要快啲食，如果唔係就變成麵糊咁！黃金荷葉包係將個包炸到好金黃香脆，表面就沾滿芳香嘅芝麻，再夾埋啲肉絲同洋蔥絲一齊食，真係好正呀！糖醋皮蛋嘅外層係薄薄嘅炸粉，入面就係煙韌軟滑嘅皮蛋，而且沾滿酸酸甜甜嘅醬汁，相當醒胃！百秒黃花魚係吸引我們入嚟食飯嘅主要原因，因呢個係獲得米芝蓮一星嘅殊榮菜色，百秒嘅意思即係唔可以煮超過百秒，肉質極之鮮甜嫩滑，而且唔會有好多骨，魚湯亦加咗薑同蔥，可以辟除咗啲腥味！傳統海蠣煎即蚵仔煎咁，不過就略嫌煎得過咗火！椒鹽豬手雖然炸得好香口鬆脆，但賣相就真係麻