華苑潮州閣

營業中

休息中

今晚幫襯咗一間都幾正宗嘅潮州打冷，因為席間有潮州人，所以梗係佢哋發板啦。呢位潮州朋友同侍應講咗一輪潮州話之後就話已經叫晒嘢，我哋都唔知佢叫咗乜嘢㗎。估唔到10月仲可以食到薄殼，因為印象中係中秋節之後就已經冇晒薄殼，今晚啲薄殼比想像中大隻，不過又唔算好先甜肥美，始終過咗造，係會勉強少少嘅。隆江豬手好好食，佢哋話成個潮州豬手最出名嘅就係喺隆江，又真係問得好林好入味，有豐富骨膠原嘅感覺，配埋芽菜仔同埋啲潮州酸菜，食嘅時候冇咁油膩。蠔餅食得多今次佢話要食水瓜烙，佢哋話呢啲蠔烙(即係蠔餅嘅正名)水瓜落九肚魚烙等等嘅煎餅，入面要有薯粉先至算正宗，同埋應該煎到一坺坺唔係好似依家咁樣成塊嘅，不過呢個水瓜烙夾起上嚟都散晒一坺坺咁，呢位潮州朋友話好滿意。滷水鵝肝喺呢度嘅名菜，所以一定要食，佢係鵝肝拼鵝心，好味道但係都真係有啲邪惡。沙嗲炒牛河味道都唔錯，個沙嗲汁做得好香。糖水就叫咗清心丸綠豆爽，唔係太甜，味道唔錯，不過一碗好似得一兩粒清心丸，比較孤寒少少啦。