十三姨 (通菜街)

營業中

休息中

聽聞十三姨幾出名，所以嚟試下。因為自己食，所以叫得一樣嘢，所以試咗佢嘅招牌菜 「十三么」。本身睇佢啲相已經覺得其貌不揚。似係將啲嘢大雜燴咁煮熟。但我諗出得名，可能食落好食掛？野食嚟到，係幾大碗嘅。食落，個湯底幾令人失望… 好！重！胡椒味。少少辣，但感覺係死辣。食食下，仲食到有微微嘅焦味（定係啲焦味好似煲仔飯咁係賣點之一嚟？）。但我個人就覺得似打邊爐燶底咁。講下啲餸。有半隻蛋，有啲雞叉燒，有啲手撕雞。唔知啲餸係本身就冇味，定畀湯啲胡椒味蓋過咗，我唔覺啲餸係有調味。上面仲有一條分咗三小段嘅齋腸（？）感覺上同碗嘢唔係好夾。食剩咗一段。一個平時食得落出面一大碗米線嘅我，最後都冇食乾淨成碗十三么。因為食食下仲食膩咗… 應該係因為個胡椒味同焦味。感覺上成碗嘢都好似屋企煮到咁。平平無其。唔係好食又唔係話好難食。 但呢碗嘢都要賣$72+10%，我覺得以呢個價錢喺出面絕對有更加多好啲嘅選擇。