珍心素食豆漿豆腐花專門店 (已結業)

珍心又係一間我好鐘意去既平民素食店，一黎平啦，二黎依度仲有好多香港地道小食。每次黎到都唔知食小食定係正餐好，而最後通常都係會揀左小食。碗仔翅餐包左珍心素碗仔翅同香滑腸粉。珍心素碗仔翅既英文名係Jane's Soup，唔知老闆英文名會唔會就係Jane呢。碗仔翅都幾多料，有木耳、冬菇、豆干同粉絲，味道同濃度同一般碗仔翅都差唔多，加埋醋同胡椒粉就perfrect。香滑腸粉真係好香滑，加埋自家製麻醬同靚豉油，成個味道昇華左。順帶一提佢地既辣醬都幾辣下，唔食得辣既朋友唔好咁貪心，一次過落勁多。猴頭菇飯可以揀唔同汁，我地就揀左燒汁。啲猴頭菇口感唔錯，個燒汁既鹹甜亦都適中，份量又夠哂多，無可挑剔。最後介紹埋我最愛既手包粢飯。粢飯可以揀普通糯米或者三色米，三色米健康啲，但唔健康既食物永遠比較吸引。熱辣辣既糯米包住仲係脆卜卜既油炸鬼同素肉鬆，平凡但好味。食得太飽，已經冇空間再食埋甜品。如果食甜品既話，一定要食冰糖腐竹糖水，味道清甜，啲腐竹好足料又夠滑，真心正。